O 16 de maio os alumnos de 6º de Ed. Primaria fomos convidados a un encontro de Xogos Tradicionais celebrado en Silleda. Alí xuntámonos a outros rapaces de Tirán, A Estrada, Sanxenxo... nun encontro no que practicamos diferentes xogos e deportes traicionais.
Ademais dos xogos, tamén gozamos cunha sesión de animación e pasámolo moi ben. Aquí vos quedan algunhas fotos desta xornada lúdica.
O dia 7 de outubro celebrase a festa da Recolleita e do magosto en Matamá, organizada polo Colectivo Malaherba.
A festa comezará ás 17:oo h, cunha andaina para nen@s na que recolleremos o millo e o cargaremos un carro con bois para baixalo á festa. A andaina estará animnada polo Bardo Abelardo.
Sobre as 19:00 h, teremos a esfollada do millo e o reparto de castañas.
Ás 20:00 h, comezará a actuación de Peter Punk, un pallaso que terá á xente moi entretida.
A derradeira actuación, será ás 22:00 h coa música de Blues do País.
Os nosos compañeiros, Diego e Marta, que son de Matamá, poden comentarnos algún aspecto mais desta festa:
D- A min encántame ir a esta festa. Sempre hai algunha actuación para os rapaces e ademais é o primeiro magosto do outono.
M- A min o que máis me gusta é esfollar o millo. Hai que lembrar que este millo que recollemos foi o que sementamos no mes de abril na festa da Sementeira.
Agardamos que vos pasedes pola festa e o pasedes moi ben.
Hai uns días, vimos nas noticias un raposo que todas as noites se achega a unha restaurante, en Rianxo, para comer churrasco. No restaurante xa lle puxeron nome e todo. Chámano Monchiño. O día do seu santo, tamén papou unhas madalenas que lle tiñan preparadas.
A nosa compañeira Sandra, aproveitando que ten familia en Rianxo, viaxou ata alí para ver se atopaba a Monchiño. Cóntanos aquí a súa experiencia:
"Cando chegamos, sen querer, espantamos co noso coche a Monchiño, que xa andaba pola terraza do restaurante. Cando nos atopamos co dono do restaurante, preguntámoslle polo raposo e díxonos que xa andaba por alí. Non tardamos moito en ver un pequeno cliente, de catro patas, con fociño e orellas afiadas e unha enorme e preciosa cola, achegarse a barra do bar, para pedir a súa cea. Tirámoslle fotos e intentamos que se achegase a nós, pero non se fiaba. Só o dono do bar conseguiu achegarse a el, pero só un momentiño."
Aquí temos a Monchiño, chegando puntual á súa cea.
Aquí xa estaba coa sobremesa, agardando a que lle trouxesen a carta de xeados.
24 de febreiro de 1837 é a data de nacemento da nosa escritora máis universal, Rosalía de Castro. A Associaçom Galega da Lingua (AGAL) réndelle homenaxe con dezaoito poemas recitados en diferentes sotaques lusófonos.
Nos vídeos, diferentes persoas da Galiza, Portugal, Brasil e Angola
poñen a súa voz a diferentes poemas escollidos polas mesmas entre os
publicados nos libros Cantares Galegos (1863) e Follas Novas (1880). As
voces son acompañadas con subtítulos da versión orixinal deses poemas.
Durante os días 22 e 23 de febreiro, podes participar na votación para escoller o mellor poema, ou a mellor lectura,
que será anunciado no dia 24. Basta clicares en ‘gosto’ no vídeo de Youtube da túa preferencia.
Terceiro traballo do noso Proxecto de Innovación en Dinamización Lingüística, desta vez dedicado a expoñer como é o xogo do Fútbol Gaélico, un deporte que levamos varios anos practicando na nosa escola e que nos últimos tempos está a coller moito pulo en Galicia. Esperamos que vos guste!!
Publicamos no noso blog "A voz do Resío" a obra de teatro realizada polos alumnos de 4º de Primaria no pasado festival de Nadal. Esta obra forma parte do noso proxecto audiovisual "Antena Resío TV". Moi bo traballo, rapaces!
A Mesa pola normalización lingüística de Galiza ven de publicar un pequeno video no que nos anima a dar pequenos pasos en prol da nosa lingua.
Aquí vos queda.
Este martes 10 de novembro celebramos na nosa escola o tradicional magosto. Como neste curso estamos no "Ano Picolímpico", os nenos e nenas do Rocío farán unha Olimpíada das Castañas, xogando en diversas probas deportivas antes pasar á degustación das castañas asadas.
Para saber máis sobre esta festa tradicional, deixamos aquí os seguintes recursos:
Recursos do Magosto
O magosto en Galiza. (Presentación)
U.D. da Castaña
Para celebrarmos o Samaín, os rapaces de 4º fixemos este vídeoclip terrorífico. O tema musical escollido foi "Os esqueletos", na versión realizada por Luis Prego no seu derradeiro traballo "Xogos infantís". Fixemos un pouco de "playback", pero pasámolo moi ben.
Con este vídeo iniciamos as actividades do proxecto de Innovación en Dinamización Lingüística "Antena Resío TV". Agardamos que vos guste!!
Comezamos o novo curso escolar 2015-16 no CEIP do Rocío. O tema elixido para o noso proxecto anual do centro, "O Ano Picolímpico", xirará arredor dos Xogos Olímpicos e Paralímpicos.
Ao longo do curso irémonos mergullando na historia dos Xogos, as súas orixes, os deportes que se realizan, as persoas que participan e o fan posible, etc.
Como xa saberedes, a celebración dos próximos Xogos Olímpicos e Paralímpicos vai transcorrer no Río de Xaneiro no verán de 2016. Van ser as primeiras Olimpíadas celebradas nun país da América do Sur e tamén as primeiras celebradas nun país de fala portuguesa.
Desde o noso blogue A VOZ DO RESÍO, non queremos deixar pasar a oportunidade deste gran acontecemento mundial, no que a nosa língua, o galego, pola súa proximidade ao portugués, terá a presenza, relevancia e utilidade internacional que algunhas veces se lle pretende negar.
Como introdución, deixamosvos con este vídeo promocional de Río 2016, apresentado por catro nenos brasileiros que nos explicarán o que alí vai acontecer dentro duns meses
